على مشارف نهاية سنة 2016…وش تغير؟ وش انجزنا؟

original.jpg

مرحبا… من زمان ما تكلمت معكم (مالي خلق اكتب بالفصحى) اعذروني… احس لهجتي اقرب للقلب وإن شاء الله مفهومة للجميع

من زمان عن التدوين ومن الزمان عن المدونة نفسها! حبيت اكتب اليوم وافضفض قبل لا تنتهي السنة بشهرين… لأن مازال أمامنا 60 يوم بطولها وبعرضها للتغيير وتنفيذ كل المخططات والاشياء اللي حلمنا فيها

فكرة الموضوع بدت براسي عقب القرارات الاقتصادية اللي قامت فيها المملكة واللي اثرت على رواتبنا كموظفين حكوميين ومع الحرب وحال الشرق الاوسط وتصريحات دونالد ترامب وهاشتقات تويتر المخيفة جدا والتوتر العام

كنت اسولف مع وحدة من صديقاتي وكانت تقول لي وهي مرتاعة انو يا الله ما عاد بقى وقت .. بينتهي العالم.. فيه اماكن لسه ابي اشوفها…في اكلات لسه ابي اذوقها… فيه ناس احبهم وابي اعترف لهم بمشاعري.. أنا احبك احبك احبك… ما ابي تصير حرب.. ما ابي راتبي ينقص.. انا خايفة انا منهارة… احس انو احنا صغار لسه…ليش قاعدين نمر بهذا كله!

وبصراحة انهيار صديقتي ما كان شيء جديد لأن الكل كان منهار ومرتاع ومتوتر وقلق… وكانوا يطالعوني باستغراب شديد لأني طول عمري انعرفت بالتوتر والقلق الشديدين والمأساوية والاكتئاب والسوداوية ووووو… فالكل مستغرب انو انا بااردة هالمرة وكأن كل هالأشياء ما تمسني اطلاقا

الفكرة اللي كانت تدور بذهني انو الحممدالله في هالسنة حققت اشياء كثير كنت ابيها من زمان وانو الحمدالله مريت بصراعات وظروف شديدة جدا كانت بتكسرني بس قدرت اقوم واواجهها وانو الحمدالله أنا قاعدة اسوي كل شيء ابيه ومو قاعدة اراجع نفسي في هالاشياء اللي احبها وابيها…ففعليا لو العالم انتهى… الحمدالله انا احس اني راضية عن نفسي وعن حياتي بشكل عام

الموضوع موب مثالية كذابة او تفاؤل زايد عن الحد… الموضوع قناعة توصلت لها بعد سنين وسنين… كوني انسانه صادقت ناس كثير وتنقلت بمدارس كثيرة ودخلت جامعتين وتطوعت كثير وتوظفت في ثلاث اماكن مختلفة… كل هالظروف والاحداث عجنتني وكونتني ووصلتني للمرحلة الحالية…اللي احس فيها فعليا بسلام داخلي

كنت قاعدة اقولهم ليش اتلحطم ع الراتب وأنا ما بيدي اغير شيء؟ ايش اللي بيفيدني لو قعدت ابكي واصيح والطم؟ بانشر طاقة سلبيه للي حولي واصير مصدر ازعاج وسوداوية وفوقها الراتب حيروح حيروح… ففعليا اوفر طاقتي لأمور اخرى… اروح الممشى… اروح الجيم.. اسوي لي كوفي احبه… اكلم صديقتي القريبة مني واسولف معها… اشوف لي فيلم رومانسي سعيد.. اقرى لي كتاب احبه… ارتب غرفتي واولع فيها شموع…اجلس مع امي…اسوي مساج..اصبغ شعري …اشتري ورد للبيت… اشتري كيكة موب لازم يكون ميلاد احد! السعادة غالبا تكون بالتفاصيل الصغيرة …مرات تكون بدفتر تلوين وكوب قهوة تركي..مرات تكون بموسيقى كلاسيكية…مرات تكون بهدية لشخص تحبينه مرة

الشهر اللي فات…كل اللي احبهم…ارسلت لهم أنا احبكم…البعض ضحك…البعض رد علي بالمثل…البعض قال شالطاري؟ حسيت فيني هالطاقة وفيني هالحب اللي ودي اعبر عنه اليوم قبل بكرة

مسكت القائمة حقتي اللي بديت فيها اول سنة وقعدت اقرا وش سويت بالضبط منها… لقيت الحمدالله اني حققت 90% منها وبنهاية 2016 بكون حققتها بالكامل وهذا ابو الانجازات لأني سنويا اسوي قائمة وانساها ولا انفذ منها الا 30% كحد اقصى

القائمة كان منها انو اشترك بجيم وطبعا هالشيء كان من 2015 واستمر معي في 2016 واني اعدل عاداتي الغذائية واقطع الباستا وسويتها الحمدالله انو اهتم بصحتي اكثر واهتم بنفسيتي اكثر وادلل نفسي اكثر وانو ما اكلف نفسي اكثر من وسعها ولا اقسى على نفسي واسامح كل اللي غلطوا علي وكانت حاقدة عليهم وشايله بقلبي سنين وسنين وهالشيء كان حيــــــــــــل صعب لأن فيه مواقف تترك ترسبات عميقة واحتجت مجهووود عشان اقدر اتجاوز هالنقطة بالذات

كل يوم يمر…كل يوم احس اني لازم اسوي فيه الاشياء اللي بنفسي وما انتظر بكرة والحمدالله قاعدة اسوي اللي اقدر عليه واتمنى كل اللي يقرون ويمرون يسوون نفس الشيء… اذا بامكانكم تسوون الشيء لا تقولون بعدين او بكرة او السنة الجاية…من اللحظة نفسها ابدوا بالشيء…ترى انتم قوة بس محتاجين تحفيز ومحتاجين تثقون بنفسكم أكثر

تحياتي

Advertisements

7 thoughts on “على مشارف نهاية سنة 2016…وش تغير؟ وش انجزنا؟

  1. ماشاء الله ياأميره أمر جميل!
    مبروك الوصول لقائمة 2016 وتحقيقها! انجاز دائم طول العمر ياارب!
    وصادقه بكلامك جداً، لو بنلاحق الهم ماعشنا، والله يتمم عليك وعلى الجميع راحة البال والرضى الداخلي بإذن الله

  2. السلام عليكم ورحمة الله وبركاته
    اختي صاحبة المدونة تحية طيبة
    قريت تدوينتك عن اختبار اللغه في الحرس
    وحابة اسئلك اذا ممكن
    هل الدوام بالمستشفى طويل
    بحيث انه يقضي على الحياه الاجتماعية الخاص بي في حال قبلت العمل في المستفشى
    وبحكم انني بنت هل العمل مريح ام انه غير مريح
    هل تنصحينني اقبل الوظيفه فيه ؟؟؟
    اهلي مافرقت معاهم يقولون القرار لك
    انت وش تنصحيني لو بغيتي ترشديني
    كل همي هل يفصلني عن عائلتي بطول دوامه
    وشكرا
    انتظر ردك وياليت يكون على ايميلي اذاممكن واذا ماودك بلاش بس اهم شي تردين على استفساري.

    • مرحبا فاطمة…بصراحة العمل في المستشفى فيه الكثير من الضرايب اللي تدفعينها… سواء على مستوى نفسي او مستوى اجتماعي
      لو كان عندك الخيار انك تتوظفين في شركة او في اي مكان اخر,,,فالأفضل تختارينه ولكن إذا ما حصلت لك الفرصة…فمن الأفضل توافقين عليه أقلها تطلعين بخبرة وهي مهمة جدا مستقبلا
      جدا جدا يأثر على حياتك الاجتماعية وهذا في البداية وعلى حسب سرعة تأقلمك…مثلا أنا مازلت بعد هالسنوات كلها مو متأقلمه وحياتي الاجتماعيه تأثرت كثير بس بالمقابل اشوف زميلاتي يطلعون ويجون يوميا ولا تأثرت حياتهم… أنا من الناس اللي احب الرواقة واحب كل شيء براحة وكوني ارجع وانا مجهدة من المستشفى فانام واطلع بعدها ع الجيم ويكون خلص اليوم ولا اقدر اقابل احد! فخليت اجتماعاتي مع الناس في الويكند وبس
      انا اقترح عليك التجربه… جربي نفسك…واذا ما عجبك الوضع اتركي…لا تعتمدين على رأي أي شخص في هالقرار…أنا على عدم تقبلي لوضعي الحالي في وظيفتي…إلا ان الزمن لو يرجع راح ارجع واقبل بهالوظيفة مرة ثانية
      لذلك جربي…وشوفي بنفسك لا ترفضين اي تجربه في حياتك قبل ما تخوضينها بنفسك
      وبالنسبة ع موضوع البنات والاختلاط…يعتمد على شخصيتك يا عزيزتي…إذا حطيتي حدود واضحة..صدقيني كائن من كائن ماراح يتجرأ عليك
      ملاحظة: الآن الحرس اعتمد نظام البصمة..الدوام من 8-5 ( 9 ساعات) ولكن ترى القطاع الخاص بالكامل هذا دوامه وهذي اوقاته

  3. الله يسعدك يارب
    طيب الموظفات المتزوجات كيف يتصرف مع بيوتهم ؟كيف حياة اطفالهم ؟وربي عندي اسئلة مسببه لي صداع

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s